未寫野之前, 恭喜晒阿妹, 佢今朝生左個女, 可惜呢排忙, 要星期六先去得睇佢.

琴日請左假TEST......TEST居然都要請假溫書, 真係唔可以再懶落去, 雖然我唔求高分, 但都唔想唔合格.

講起請假, 前日我同老細請假果陣, 佢居然問我係咪去interview.  當我扮晒唔明問佢點解嘅時候, 佢居然答我佢just guest...... 你咁問我, 如果我答係咁又點呢?

今日阿老神子迫我交野, 因為老細聽日返, 交野都好應該, 但唔該唔好做野晒d無謂嘅report, 仲要係發明無耐, 之前d同事無做過架喎!  ok! 我今日唔駛返學, 咪同你鬥夜走! 結果我整好晒果陣, 阿老神子已經無聲無息咁走左, 樓下office仲要係落閘放狗果隻, 當時, 係晚上嘅7點正!  你走得咁急點解要迫我今日交晒d野俾你睇呢? 同我鬥夜? 早10年前我已經見識過OT地獄嘅滋味, 托果份工嘅福, 以後嘅工就算點開OT我都覺得濕濕碎! 7點? SO WHAT?

阿老細聽日返office, 我真係好想聽日就同佢講我唔撈.  但呢幾日另一個阿姐上左黎坐, 雖然聞說佢情緒成日都唔穩定, 但我返左咁耐, 佢又真係一次都無發過我老皮喎?! 佢仲幫我減左少少阿老神子無理嘅要求添...... 可惜佢係admin. 阿老神子係a/c, 大家都做左咁耐, 始終都唔可以跩過界......

今日, 神奇地有幾枱agent打黎話有工介紹, 更奇怪嘅係, 佢地介紹嘅工, 全部都係d數俾人攪到亂晒, 所以家下要請個人返去執...... 如果有睇開adv.嘅話, 每年近年尾都會有大量嘅a/c temp. post出現, 無他嘅, 要趕住執番好盤數交差, 呢個係正常現像.  不過我今日發現左一個更奇怪嘅現像..... 阿老神子今日send左張auditor嘅requirement俾我, 話佢之前同我講過要做, 但我唔記得左喎..... 哇! 佢真係當我智障喎! 果張野係我/或者任何一個做a/c嘅人, 只要係要你做嘅話, 都無可能見過會唔記得嘅野...... 果張咁勁嘅野, 咪就係auditor俾嘅07年問題集囉!

呢問公司12月year end, 呢張問題點解家下先要解決呢? 07年d野, 有嘅已經全部send晒去auditor度, 無嘅家下點問我都答唔出架啦?  我今日淨係搵單都搵唔到, 你叫我點嘔番07年年頭果d消失的單據俾你呢? 剩係睇個bank a/c, 都已經亂到9彩, d bank re. 有d有, 有d無, d數由年中開始入錯, 仲有d唔make sense嘅入數方法....... 真係令我大開眼界, 唔好話07年d問題, 08年都肯定會勁多問題..... 老實講, 我真係"鄧"睇呢盤數嘅auditor慘...... 唔怪得阿鳳鸞話做audit可以好快咁學識a/c野...... 呢d應該叫做見多識廣啦呱!?

諗諗下, 都係聽日同老細講唔撈, 同你執無所謂, 但係執數嘅同時, 仲要俾你無理地challenge同玩嘅話, 我就硬係唔咁心, 或者就好似sally話齋, 我唔係錯, 但我咁嘅心態去到邊度都會做唔長....... 但係呢, 我繼續係度做亦都唔見得會做得長喎! 咁我又可以點呢?

上個星期, 我因為頂唔住老神子所以黑佢面, 佢真係打俾我老細篤我背脊! good! 你唔俾面我我又駛乜俾面你? 順手睇下呢個老細跟唔跟得過都好.  測試結果顯示: 前車之鑑呢句成語, 真係一d都無講錯.

因為阿老細仲出緊trip, 所以佢無乜點, 只係打左個長途黎安撫左我, 然後好婉轉咁叫我聽老神子話. ok! 你係老細你想點咪點囉! 表面好民主咁叫我講有咩問題, 同你講果陣就話我呢樣果樣, 結果都係唔信我.  我明白我係新人, 返左一個月唔夠, 你唔信我而信一個跟左你N年嘅老神子係好正常嘅事.  不過有D野我又真係勁唔明, 好似過左果個星期六咁, 老細出左trip, 小朋友short week, 全公司得番我一個返工, 阿老神子又逼我交野. 我已經問左老細我係咪去老神子果個office坐啦! 阿老細又話唔好, 叫小朋友俾鎖匙我, 點知小朋友俾錯鎖匙我. 我無門口入要走落去攞老神子攞鎖匙開門, 到我走果陣想還番條匙俾老神子, 但佢地間公司已經落閘放狗, 一個人都無.  跟住今日一早, 阿老神子又send e-mail cc 俾全世界叫我俾番條匙佢! 不過佢個個e-mail address都啱, 淨係打錯左我果個.......

ok! 你咁緊條匙我咪俾番你先, 不過故事仲未完, 佢仲叫我抬晒所有嘅voucher俾佢過目. 過目嘅意思係真係過目喎! 佢睇下個file, 然後睇下入面係d咩, 問左我兩句呢個file係咩, 跟住叫我抬番上去(註: 我同佢坐唔同office, 唔同公司).  我真係好想問佢: 乜咁樣好好玩咩?

Lunch嘅時候, 因為老神子間公司有新人返工, 佢大佬請食飯, 佢地叫埋我同小朋友一齊食,(註: 我同小朋友係同一間公司, 老細係老神子間公司嘅前大佬, 家下請食飯嘅大佬係老細嘅前大佬) 行緊去食飯嘅時候, 佢大佬好順口咁問我老細去左邊, 我因為唔知可唔可以答佢, 所以好唔肯定咁同佢講左老細去左邊(因為老神子佢地可以收到我地公司fax, 所以老細去左邊佢地理論上有人會知道), 點知下晝果陣, 阿老細send左個sms俾我, 話叫我唔好同outside嘅人講佢去左邊...... 阿老細, outside嘅人嘅定義係乜呢? 到底你前大老係唔係outside people呢? 如果係, 點解你之前唔講你呢個trip唔可以俾人知呢? 你唔想俾人知嘅話, 講一句私人trip與公事無關咪得囉? 我又可以同人講我唔知你去左邊, 駛唔駛咁神秘呀? 同埋, 呢個問題同呢個sms係咪即係意味住你搵人試緊我?

其實琴日都已經開始send cv, 不過一個feedback都無, 老細20號返黎, 啱啱過左一個月, 要7日通知, 即係如果呢兩個幾月內搵唔到工, 就要辭職返屋企量住地黎搵, 早知佢呢個offer就reject啦! 果陣個市無咁差架! 呢d真係命黎, 唔到我唔認.

今日, 差d火到同老神子阿姐鬧交, 如果唔係老細咁啱出左trip, 我諗我好大機會會同佢講唔撈!  家下諗起都仲有d火, 如果你係一個好smart好掂嘅人, 我俾你challenge我唔掂, 而你真係捉到我做錯野嘅話, 我無野好講.  之但係你本身已經係一個唔掂嘅人, 仲要challenge我, 話我唔掂過你嘅話, 對我黎講, 呢d叫侮辱.

可能我真係一個孤陋寡聞嘅人, 我真係唔明點解一個system, 明明support到multi currency, 點解唔用要整single currency? 點解d invoice no.可以鐘意點就點? d filing可以左一張右一張? 點解老神子示範俾我睇嘅第一張voucher會係duplicate payment? 點解佢會唔知道? 點解年頭嘅temp. pay會被遺忘無入到? 你咁做野法居然話我同一個連double entry都唔識入嘅妹妹仔一樣? 我火到即時黑面, 你要同老細講話我唔掂就即管話, 如果老細在場就更好.

不過, 人係氾賤嘅.  唔知點解, 當我括出去黑面發老皮嘅時候, 阿老神子居然對我客客氣氣.  我俾面你做得耐唔出聲, 你就越黎越過份, 到我發皮四數晒你d野出黎, 你先識收?  呢d叫面就人地俾, 架就自己丟.  如果聽日再係咁嘅話, 真係要再搵下工先得, 因為前車之鑑!

新工返左一星期多兩日, 估唔到一間咁細嘅公司, 居然會有咁多騎呢嘅人.  其實, 返左工幾日, 就已經明白點解我上手果兩位姐姐會被炒.  雖然我都只係做左一個星期多dd, 就已經有想放個炸彈炸左教(點?)我做野果位姐姐嘅衝動! 又係一個新記錄, 我一直以為我嘅EQ有高到添.......

講真, 我真係覺得阿老細都幾慘, 我上手果位姐姐仲慘.  試問有個咁嘅老神子係度, 講佢講唔到, 成日做埋晒d無謂野.  今日叫你咁做, 當你跟足照做嘅時候就話你做錯叫你改, 到頭來都係做番當初你建議果套. 你問佢點解咩? 佢居然會叫你唔好問, 佢做嘅所有野都係有原因嘅, 你睇就得架啦!  頂!!!!!!!!!!!你俾個咁嘅答案我, 你叫我點面對你呀?

唔怪得之第一手個姐姐會做錯晒d野, 第二手個姐姐會做到咩野心機都無晒, 結果乜都唔做本"啤".  雖然阿老細話有咩野可以同佢講, 而我亦相信佢會聽.  不過咁嘅情況, 你話我又可以講d乜? 講又好似篤佢背脊咁, 唔講條氣又頂住頂住, 更嚴重嘅係, 老細都知佢係d咁嘅人, 不過佢一日未過晒d料過黎, 一日都奈佢唔何(註:阿老神子係外判嘅, 老細嘅前老細隻馬, 唔係同一間公司)......

EQ呢家野, 真係唔夠Karen妹勁, 我地兩個又真係地獄黑仔黎, 點解會遇到d咁似嘅阿姐嘅呢? 一命二運三風水又真係無講錯, 好運又真係乜都得架喎! 真係唔知呢度可以玩幾耐, 真係做又唔係, 唔做又唔係......

琴日, 終於都去左剪髮, 呢排好忙, 個頭都核突左好耐.   識我嘅人都知, 我無表情個樣都好兇狠下, 琴日仲要俾公司個阿姐同上手個姐姐攪到我心情唔多靚, 雖然無乜野, 不過我相信, 當日我個樣一d都唔善良.

係咁嘅情況之下, 係尖咀都仲有d白撞阿姐問我著緊件衫仲有無細碼...... 勁呀! 個呀姐仲要操不純正嘅廣東話, 如果唔係以為佢問路, 我真係彩佢都傻.  不過, 我又真係幾佩服佢嘅勇氣, 我咁嘅樣佢都夠膽叫我! 我對佢冷笑左兩聲就行左去, 佢個樣雖然有d餚底, 但都無嚇到走左, 都真係幾專業下.

好多年前, 我都試過係銅鑼灣俾一個同樣操不純正廣東話嘅阿姐問過同樣嘅問題.  當時, 呢個阿姐又真係純粹問左我件衫係邊度買, 然後就走左啦! 有時諗起上黎, 到底呢個阿姐真係想知我件衫係邊度買丫? 定係俾我嚇走左呢?